Manchester City i kundërpërgjigjet United-it, duke mposhtur me rezultatin 0-1 Chelsean në Londër, në atë që ishte krye-ndeshja e kësaj jave të Premiere League. Nga ana tjetër, skuadra e drejtuar nga Antonio Conte hodhi një hap që mund të rezultojë fatal në luftën për të mbrojtur titullin kampion, pasi tani e shikon veten gjashtë pikë larg kreut të tabelës.
Pjesa e parë ishte mjaft e bukur dhe e luftuar nga të dy ekipet, por u mbyll me rrjeta të paprekura, kjo edhe për meritë të portierëve. Në minutën e 35, Antonio Conte u detyrua të largojë nga fusha e lojës Alvaro Moratën e dëmtuar, për ta zëvendësuar me brazilianin Williams.
Skuadra e Guardiolës kaloi në avantazh në minutën e 67, me anë të belgut De Bruyne, i cili shfrytëzoi më së miri një asist të sulmuesit brazilian Gabriel Jesus. Minutat e mbetura sollën shumë raste për të dy ekipet, por topi nuk përfundoi në rrjetën e asnjërës prej portave dhe ekipi i Guardiolës iu gëzua tre pikëve në transfertën ndaj njërit prej rivalëve direkt në luftën për titull.
Më herët, Manchester United fitoi pastër, 4-0 ndaj modestëve të Crystal Palace, ndërsa Tottenham triumfoi me të njëjtin rezultat ndaj Huddersfield, ku Harry Kane shkëlqeu sërish duke shënuar dy gola. Spanjolli Mata hapi serinë e golave për United, në minutën e 3-të, ndërsa Marouanne Fellaini u bë protagonist në këtë takim, me dy gola të shënuar, nga një në çdo pjesë. Gjithsesi, firmën i fundit e hodhi sulmuesi kryesor i ‘Djajve të kuq’, belgu tjetër Romelu Lukaku, që vulosi rezultatin 4-0.
Ndonëse trajneri Mourinho kishte lënë në stol një pjesë të mirë të titullarëve që luajtën në Rusi, të mërkurën në mbrëmje, ndaj CSKA-së për Champions, Manchester nuk e pati aspak të vështirë të marrë kontrollin e lojës ndaj kundërshtarit. Pas shtatë javëve të para, Premiere League kryesohet nga dy ekipet e Manchesterit, me nga 19 pikë, ndërsa në vend të tretë renditet Tottenham me 14. Chelsea mban momentalisht vendin e katërt me 13 pikë, por mund të parakalohet nga Liverpool e Arsenal, që luajnë nesër.
