Torino nuk po kalon aspak një periudhë të mirë në kampionat dhe humbja e radhës me Lazion e çoi në pesë numrin e takimeve pa fitore, duke regjistruar gjithashtu humbjen e pestë në 10 javë të luajtura. Sigurisht që një formë e tillë e skuadrës, në radhë të parë i faturohet trajnerit Walter Mazzarri, i cili gjithnjë e më tepër rrezikon vendin e punës. Megjithatë, pas humbjes 4-0 ndaj Lazios, presidenti Urbano Cairo nxitoi të theksonte se trajneri është i fundit që rrezikon, por diçka e tillë nuk pritet të zgjasë shumë.
Sipas mediave italiane, pavarësisht deklaratës së kreut më të lartë të klubit, Mazzarri gjithnjë e më tepër fillon të ndiejë hijen e pasardhësit të tij. Emri që qarkullon më tepër në ambientin “Granata” është ai i ish-trajnerit të Milanit, Gennaro Gattuso, ndërkohë që më pak shanse ka Davide Nicola apo Cesare Prandelli. Derbi ndaj Juventusit ndoshta do të jetë vendimtar për të ardhmen e Walter Mazzarrit.
