Vesel Limaj është i zyrtarizuari i radhës te Kukësi si pjesë e përforcimeve për pjesëmarrjen në Champions League dhe për sezonin e ri futbollistik në Kategorinë Superiore. Mesfushori me tipare sulmuese i cili prej kohësh stërvitet me Kukësin dhe muaj më parë u kthye në një mollë sherri mes klubit verilindor dhe Bylisit ku u aktivizua në sezonin e fundit, ka firmosur një kontratë 2-vjeçare me Kukësin. 21-vjeçari konsiderohet si një lojtar me shumë prespektivë teksa në karrierën e tij të deritanishme është aktivizuar me skuadrën e dytë të Hamburgut në kategorinë e 4-t gjermane dhe me Horn në ligën e dytë austriake edhe pse minutat e luajtura me këto dy skuadra kanë qenë fare pak për Limajn. Ai spikati te Bylis në Kategorinë e Parë sezonin e kaluar teksa arriti t’i shënonte një gol edhe Luftëtarit në Kupën e Shqipërisë.
