Prishtina gjeti fitoren e tretë radhazi në kampionat, të dytën nën drejtimin e Armend Dallkut në stol, teksa mbrëmjen e sotme mposhti me rezultatin 2-0 skuadrën e Dukagjinit.
Takimi i zhvilluar sot në stadiumin “Fadil Vokrri” të kryeqytetit, ishte i prapambetur nga java e dytë, ndërsa bardheblutë bënë detyrën duke dalë me pikët maksimale.
Meriton Korenica shënoi golin e parë për Prishtinën në minutën e 7, ndërsa në fillim të pjesës së dytë ishte Leonit Abazi që dyfishoi shifrat.
Me këtë fitore Prishtina ngjitet në kuotën e 10 pikëve, dy më pak se Feronikeli e Gjilani kryesues, ndërsa Dukagjini mbetet në vendin e fundit me vetëm një pikë, pa provuar ende shijen e fitores, por edhe të golit të shënuar.
