Fundjavën e kaluar Prishtina pësoi humbjen e parë të vitit 2021, pasi u mposht nga Feronikeli në ndeshjen e kampionatit, por sot i ktheu reston skuadrës nga Drenasi, duke e eliminuar nga Kupa e Kosovës.
Pas një ndeshjeje të fortë dhe të luftuar shumë, me raste në të dyja anët dhe dëshirë të skajshme për të kaluar në mesin e katër skuadrave më të mira në këtë sezon, koha e rregullt dhe 30 minutat shtesë u mbyllën në barazim pa gola dhe gjithçka u vendos në goditjen e 11-metërshave.
Aty më të suksesshëm ishin kryeqytetasit të cilët në fund shënuan fitore me rezultat të përgjithshëm 4-2. Jean Carrioca dhe Besmir Bojku dështuan nga pika e penalltisë, ndërsa te Prishtina gaboi vetëm Krasniqi, ndaj kryeqytetasit ia dolën të avancojnë më tej në gjysmëfinale.
Befasia ka qenë në sfidën tjetër çerekfinale, ku Dukagjini që militon në Ligën e Parë, mposhti Drenicën me rezultatin 1-0 dhe e eliminoi nga Kupa. Trajneri Bledar Devolli u shfaq mjaft i nervozuar dhe u ankua për disa vendime të arbitrit, teksa paralajmëroi edhe dorëheqjen pas ndeshjes, por tani mbetet të shihet nëse do ta pranojnë këtë drejtuesit e Drenicës.
Edhe këtu pati disa raste të mira shënimi, megjithatë mjaftoi një gol i Jeton Dushit, që i dha fitoren skuadrës që po drejtohet me mjaft sukses nga ish mbrojtësi i Kombëtares Shqiptare, Armend Dallku.
Dukagjini ka një skuadër mjaft të mirë dhe me shumë gjasë që të rikthehet në Superligë, pasi aktualisht është e dyta në tabelë në Grupin A me 39 pikë, dy më pak se Malisheva, kurse Drenicën e pret punë shumë e vështirë për të shpëtuar pa u larguar për herë të parë nga elita e futbollit kosovar.