Përfundoi në barazim pa gola sfida mes Ferizajt dhe Prishtinës, që u luajt në stadiumin “Ismet Shabani”. Kryeqytetasit, edhe pse ishin në kërkues në lojën e tyre nuk arritën të thyenin formacionin e Afrim Tovërlanit, që kjo pikë e fituar më shumë se për renditjen vlen për moralin e ekipit për ndeshjen në vazhdim. Prishtina mund të humbasë kreun nëse Feronikeli, që ka grumbulluar dy pikë më pak, arrin të triumfojë në fushën e Dritës.
Zgjohet pas 4 humbjeve radhazi Drenica, që iu imponua me rezultatin e thellë 3-0 Trepçës ’89 në sfidën e luajtur në Skënderaj. Sykaj shënoi golin e parë në minutën e 15-të, ndërsa Pasoma dyfishoi shifrat në minutën e 50-të. Nuk mjaftoi dëshira e ‘89-shit për të kthyer rrjedhën e lojës, përkundrazi në kohën shtesë vendësit shënuan edhe golin e tretë. Me këtë sukses, pas katër humbjeve radhazi, Drenica parakaloi pikërisht skuadrën nga Mitrovica në renditje.
