Prishtina hodhi një hap fals në sfidën e parë paraeliminatore të Ligës së Europës, përballë skuadrës St. Joseph nga Gjibraltari, që u zhvillua në stadiumin “Fadil Vokrri” të kryeqytetit të Kosovës.
Të besuarit e Mirel Josës arritën të kalojnë të parët në avantazh, duke zhbllokuar sfidën në minutën e 28’ me anë të një 11-metërshi të ekzekutuar saktësisht nga mbrojtësi veteran Armend Dallku.
Megjithatë reagimi i miqve ishte i menjëhershëm, pasi vetëm 3 minuta më vonë ishte sulmuesi Juanfri, që shënoi në portën e Visar Bekajt, duke barazuar, ndërsa më pas rezultati mbeti i pandryshuar deri në fund.
Natyrisht që ky barazim ishte zhgënjyes për Prishtinën, që shihej dukshëm favorite në këtë takim, por tashmë kryeqytetasit e Kosovës do të mund të tentojnë kualifikimin për në eliminatoret e Europa Leagues, në sfidën e kthimit më 2 korrik, në Gjibraltar.
