Kukësi mund të ketë dy mungesa shumë të rëndësishme në supersfidën e kësaj fundjave në kategorinë Superiore atë ndaj Skënderbeut e cila mund të përcaktojë shumë në garën për titullin kampion. Sulmuesi azer Rauf Alyiev i cili u konsiderua si goditja e madhe e verilindorëve në merkaton e verës, por që deri tani nuk ka bindur me paraqitjet e tij dhe mund të largohet në janar nga Kukësi, ka shfaqur disa shqetësime në stërvitjen e fundit. Alyiev ka probleme në kaviljen e këmbës së djathtë dhe rrezikon shumë të humbasë sfidën ndaj korçarëve, në një moment kur ai projektohet titullar nga trajneri Milinkoviç pasi edhe ndeshjen ndaj Laçit, shtatlarti azer e nisi që nga minuta e parë. Pas largimit të Zeqirit për Kukësin do të ishte e tepërt edhe mungesa e Milos Krkotic. Mesfushori ka udhëtuar drejt Malit të Zi ditën e hënë për arsye familjare dhe pritet të rikthehet në skuadër vetëm të enjten.
