E ardhmja e Robert Lewandowskit është mes Bayern Munchen dhe Barcelonës. Bomberi polak ka edhe një vit kontratë me kampionët e Gjermanisë, teksa shpreson të transferohet në “Camp Nou”.
Klubi katalanas është gati të paguajë rreth 35 milionë euro për kartonin e 33-vjeçarit polak, i cili sezonin e kaluar u kthye në golashënuesin më të mirë në historinë e Bundesligas.
Një nga shkaqet pse Lewandowski po kërkon largimin nga Gjermania lidhet me “Topin e Artë”. Sulmuesi ishte i pafat në vitin 2020, pasi pandemia ndikoi që të mos fitonte trofeun prestigjioz.
Ndërkohë, vitin e kaluar dështoi në “finale” përballë Leo Messit, me argjentinasin që e fitoi çmimin për herë të shtatë në karrierë.
Sport.es shkruan se Lewandowski është bindur që te Bayerni nuk mund ta fitojë kurrë “Topin e Artë”, pasi golat dhe rekordet në Bundesliga nuk mjaftojnë.
Barcelona është skuadra perfekte për të vijuar shënimin e golave të shumtë dhe për të tentuar edhe njëherë suksesin në “Topin e Artë”.