PSG insiston për brazialianin Allan, ndërsa Napoli do të mendohet. Sipas medieve italiane, klubi më i madh francez ka ofruar 60 milionë euro për kartonin e futbollistit, por ç’është më e rëndësishmja, ka lindur ideja e përfshirjes në marrëveshje të një sponsorizimi nga Qatar Airways, që do ta çonte shumën e përfituar nga italianët mbi 100 milionë euro. Nga ana e francezëve, që i kanë ofruar lojtarit kontratë 4-vjeçare me një pagë 8 milionë euro në sezon, ka shumë optimizëm.
Pavarësisht rezistencës së deritanishme të presidentit De Laurentiis, partneriteti komercial duket se do ta zgjidhë nyjën për të shkuar drejt një marrëveshjeje përfundimtare, aq më tepër që edhe dëshira e brazilianit është të nisë një aventurë të re në kryeqytetin francez. Fakti që nga Spanja informojnë se Napoli ka gjetur gjuhën e përbashkët me Villarealin për blerjen e Fornals të bën të mendosh që drejtuesit e klubit italian i kanë marrë masat për largimin e Allan.