Qershori është një muaj në të cilin Shqipëria tradicionalisht nuk ka entuziazmuar në fushë. Fundi i sezonit, lodhja e lojtarëve, momenti për të bërë pak pushime të merituara në mënyrë që të rikuperohen energjitë për edicionin e ri. Të gjitha këto janë arsye për të mos u paraqitur në nivelin e duhur, megjithatë nuk duhet të shërbejnë si justifikim. Aq më tepër pas dy performancave të dobëta të Kombëtares në testet me Kosovën dhe Ukrainën.
Të përdorësh vetëm argumentin e lodhjes do të ishte e pavend. Kjo edhe për faktin se në vitet e fundit, në këtë periudhë Shqipëria ka regjistruar disa rezultate të rëndësishme. Nga fitorja e paprecedentë 1-0 ndaj Francës, në miqësoren e luajtur në “Elbasan Arena” në vitin 2015, ku vendosi goli i Ergys Kaçes.
Për të vijuar me pjesëmarrjen historike në Kampionatin Europian Francë 2016, ku humbjet me Zvicrën dhe Francën u shoqëruan nga suksesi ndaj Rumanisë, me paraqitje me të cilat në tërësi kuqezinjtë meritonin më tepër dhe shpresuan deri në fund te kalimi i grupit.
Suksesi më i fundit gjatë muajit qershor ishte ai 3-0 në fushën e Izraelit, në vitin 2017 gjatë kualifikueseve të Kupës së Botës. Një paraqitje mjaft e mirë e Shqipërisë, që shërbeu si hakmarrje për humbjen mes polemikave dhe episodeve të diskutueshëm në shtëpi. Ajo ishte edhe ndeshja në të cilën Gianni De Biasi mbylli aventurën e tij në stolin e Kombëtares.
Të gjithë, precedentë se askush, nga trajneri deri te lojtarët nuk mund të fshihen pas justifikimit të lodhjes pas një sezoni të gjatë. Ajo që nevojitet tani është marrja e përgjegjësive. Liga e Kombeve nis shumë shpejt dhe duhen nxjerrë mësime, për të evituar që turneu i cili vlerësohej si një mundësi e shkëlqyer për një biletë në Euro 2020 të mos kthehet në makth.