Elseid Hysaj nuk do të shkojë tek Atletico e Madridit, sikurse ishte raportuar kohët e fundit, pasi klubi spanjoll hoqi dorë nga mbrojtësi për shkak të pretendimeve të larta financiare të Napolit duke firmosur me Trippier të Tottenhamit, por kjo nuk do të thotë se për shqiptarin mbyllen dyert e largimit nga skuadra që drejtohet nga Carlo Ancelotti.
Për mbrojtësin kuqezi është hedhur në sulm Roma, që ka shfrytëzuar bisedimet me menaxherin Mario Giuffredi, që është njeriu që përfaqëson edhe interesat e Veretout, për të cilin klubi kryeqytetas po këmbëngul prej kohësh. Një menaxher për dy futbollistë. Hysaj është i duhuri për skemat e Fonsecas në rolin e anësorit të djathtë, sigurisht nëse në këtë pozicion trajneri nuk do të preferojë Florenzin.
Por kujdes, Roma ka një konkurrent të fortë për 25-vjeçarin nga Shkodra. Bëhet fjalë për Tottenhamin, që kërkon ta mbulojë boshllëkun e lënë nga Trippier, që iu bashkua Atleticos, pikërisht me Hysajn. Merkatoja ofron situata të paimagjinueshme. Tottenhami përfitoi 20 milionë paundë për Trippier dhe për të njëjtën shifër e ndoshta edhe më pak synon të marrë shqiptarin.
