U luajtën 6 ndeshje në NBA, që dhuruan spektakël dhe rezultate befasuese. Dueli më i rëndësishëm i mbrëmjes u zhvillua në “Scotiabank Arena” të Torontos, ku Raptors u mposhtën 92-105 nga Milwaukee Bucks, që, të udhëhequr nga Giannis Antetokounmpo, e vunë që në fillim në vështirësi ekipin kanadez. Edhe pse më i miri mbi parket rezultoi Siakam i Raptors me 28 pikë, loja e mirë mbrojtëse e Bucks bëri diferencën, me Antetokounmpon dhe Middleton që shënuan respektivisht 19 dhe 18 pikë. Me këtë sukses Milwaukee konsolidon vendin e parë në Konferencën e Lindjes, ku ndiqet pikërisht nga Toronto.
Golden State Warriors e paguan shtrenjtë mungesën e Klay Thompson, duke u mposhtur brenda në “Oracle Arena” 104-113 nga Philadephia 76ers. Kampionët në fuqi patën një mesatare të dobët realizimesh për tre, 11 nga 38 tentativa, ndërsa 41 pikët e Stephen Curry-t rezultuan të pamjaftueshme për të marrë fitoren e radhës.
Derbi i kalifornian mes Clippers dhe Lakers u mbyll vetëm në kohën shtesë në favor të skuadrës së LeBron James. Ish-“ylli” i Cavaliers u rikthye mbi parket pas një mungese të gjatë, duke rezultuar vendimtar me 24 pikë, 9 asistime dhe plot 14 “rebound”. Koha e rregullt u mbyll 112-112, ndërsa në 5 minutat shtesë Lakers ruajtën qetësinë, duke fituar në fund me 3 pikë diferencë.
Këto janë të gjitha rezultatet e mbrëmjes:
Detroit Pistons – Dallas Mavericks 93-89
Orlando Magic – Indiana Pacers 107-100
Toronto Raptors – Milwaukee Bucks 92-105
San Antonio Spurs – Brooklyn Nets 117-114
Golden State Warriors – Philadelphia 76ers 104-113
Los Angeles Clippers – Los Angeles Lakers 120-123
