Reali i Madridit dorëzoi kreun e renditjes së la Ligës te Barcelona, pasi u mposht me rezultatin minimal 1-0 në transfertën ndaj Mallorcës, që u vendos nga një gol i Junior që në minutën e 7 të sfidës së zhvilluar në “Estadio de Son Moix”.
Me disa futbollistë të dëmtuar, mes të cilëve edhe Modriç e Topni Kroos, Zinedine Zidane kishte preferuar një rreshtim 4-4-2, me Junior Vinicius si mesfushor i majtë dhe dyshen Benzema-Joviç, ndërsa francezi Varane ishte lënë në stol.
Vendasit gjetën shumë shpejt golin e avantazhit, teksa më pas loja u dominua nga madrilenët, që mbajtën gjatë topin dhe krijuan disa mundësi shënimi, por pa arritur të gjejnë golin e barazimit.
Gjërat për madrilenët u komplikuan edhe më shumë në minutën e 74’, kur mbrojtësi i djathtë Odriozola u ndëshkua me kartonin e dytë të verdhë dhe la skuadrën me 10 lojtarë.
Të besuarit e Zidane provuan deri në fund të gjejnë golin e barazimit, ndërsa trajneri francez hodhi në fushë edhe Rodrygo, Diaz e Valverde, por pa arritur të shmangë humbjen, që e lë në vendin e dytë me 18 pikë, një më pak se Barcelona kryesuese.
