Barcelona u ndal sërish dje në një barazim 2-2 në transfertën ndaj Celta Vigos dhe ndonëse mori përkohësisht kreun e renditjes me një pikë më shumë se Reali i Madridit, u dha mundësinë këtyre të fundit që të shkëputen të vetëm në krye, nëse fitojnë sfidën e radhës, që përkon pikërisht me një transfertë në Katalunjë përballë Espanyolit.
Los Blancos ishin të parët që u izoluan dhe u futën në regjim karantine, sepse sic dihet njëri nga basketbollistët e ekipit të Realit rezultoi pozitiv me virusin COVID-19, sidoqoftë shkëputja për shkak të ndërprerjes së gjatë dhe masave shtrënguese që iu imponuan futbollistëve për shkak të pandemisë së koronavirusit duket se nuk ka influencuar aspak te lojtarët e skuadrës madrilene.
Ekipi i drejtuar nga trajneri Zinedine Zidane është rikthyer në mënyrën më të mirë të mundshme duke fituar katër ndeshjet që ka luajtur deri tani. Los Blancos kanë përfituar edhe nga kalendari i favorshëm, sepse futbollistët e skuadrës madrilene kanë patur privilegjin për të luajtur 3 nga 4 sfidat e radhës pikërisht në qendrën stërvitore “Ciudad Real Madrid”, më saktë në Valdebebas, në stadiumin “Alfredo Di Stefano”, ku ekipi bën edhe stërvitjen e përditshme, sidoqoftë përveç Eibarit dhe Mallorcës, formacioni madrilen është përballur gjithashtu edhe me Valencian dhe Sociedadin, me këta të fundit madje në “Anoeta”, një fushë shumë e vështirë, për më tepër ishte pikërisht klubi bask që i eliminoi Los blancos nga Kupa e Mbretit, që në fillimin e muajit shkurt, pas triumfit 4-3 në fazën çerekfinale brenda në Santiago Bernabeu.
Në takimin e fundit, të mërkurën në mbrëmje, pavarësisht disa ndryshimeve të bëra në formacion nga trajneri francez, Reali u duk sikur shfaqi shenja lodhjeje, sidoqoftë me nga një gol për çdo pjesë misioni duhet të konsiderohet si i përmbushur. Detyra e radhës duket elementare për rekordmenët e kampionatit spanjoll, pasi Reali do të masë forcat me ekipin e Espanjolit, që pozicionohet i fundit në Primera Division. Klubi katalanas u rikthye pas pandemisë së koronavirusit me fitoren ndaj Alaveshit në shtëpi, madje në ndeshjen pasardhës bardheblutë bllokuan edhe ekipin e Getafe-s brenda në “Coliseum Alfonso Perez”, sidoqoftë humbjet me Levanten dhe Betisin e rendisin Espanjolin në fundin e klasifikimit, në kuotën modeste të 24 pikëve, plot 8 pikë larg Eibarit, ekipit që pozicionohet ngjitur me zonën e ftohtë.
Reali do të bëj çmos për të siguruar 3 pikët e radhës, duke patur parasysh që në fillimin e muajit korrik në harkun e vetëm katër ditëve ekipi madrilen do të përballet me kundërshtarë si Getafe dhe Athletic Bilbao. Pritet një lloj reagimi nga ekipi i Espanjolit sidomos pas vendimit të drejtuesve për të shkarkuar trajnerin Abelardo pas disfatës me Betisin në Andaluzi. Krerët e Klubit ia kanë besuar timonin e skuadrës deri në përfundimin e këtij sezoni ish-lojtarit të këtij ekipi, 43-vjeçarit Francisco Rufete, megjithatë vlen të kujtohet gjithashtu fakti që në ndeshjen e parë të vitit 2020 bardheblutë frenuan Barçën në derbi, në një barazim me rezultatin 2-2.
Vendasit nuk kanë probleme me formacionin, ndërsa Los Blancos përveç dyshes së dëmtuar Luka Jovic-Lucas Vazquez nuk do të kenë as lojtarë si Luka Modric dhe Ferland Mendy që nuk do të jenë për shkak të kartonëve. Takimi do të luhet në orën 22:00 në “Cornella de Llobregat” dhe vlen të kujtohet fakti se Reali i Madriditi ka fituar 14 nga 15 përballjet e fundit ndërmjet këtyre dy skuadrave në të gjithë kompeticionet.