Ka mjaftuar një gol i Reginaldos në fillim të pjesës së dytë, që Kukësi të mposhtë Teutën minimalisht 1-0 dhe të kualifikohet për në fazën gjysmëfinale të Kupës së Shqipërisë.
Në sfidën e zhvilluar në “Elbasan Arena”, skuadra e Ndreut menaxhoi mirë lojën, duke qenë se favorizohej edhe nga rezultati i ndeshjes së parë në “Niko Dovana”.
Pas një pjese të parë të vakët, verilindorët zhbllokuan rezultatin në minutën e 61-të, kur Regonaldo shfrytëzoi një asist të Cordeiros dhe arriti të mposhtë portierin e durrsakëve Hidi.
Reagimi i të besuarve të Blendi Shkëmbit nuk ishte në lartësinë e duhur për të vënë në vështirësi prapavijën e Kukësit, duke bërë që të mbetet në fuqi rezultati 1-0, i cili çon verilindorët në gjysmëfinale.
