Kombëtarja shqiptare këtë të mërkurë zhvilloi seancën e rradhës stërvitore, teksa gjatë paradites kuqezinjtë patën zhvilluar një tjetër stërvitje me karakter fizik që zgjati për rreth 45 minuta. Një pasdite jo edhe aq e qetë për trajnerin Edy Reja i cili shqetësimin më të madh që i ka karakterizuar prej kohësh kuqezinjtë pra dëmtimet janë shfaqur sërish.
Shqetësime fizike për Naser Alijin, i cili gjatë pasdites ka kryer disa ushtrime fizike të lehta veçmas nga pjesa tjetër e grupit, teksa për t’u vlerësuar më me kujdes mbetet edhe gjëndja e Ledjan Memushaj i cili gjithashtu është stërvitur i diferencuar duke bërë disa vrapime të lehta rreth fushës , ndërsa stafi mjekësor i kuqezinjve do të japë edhe një përgjigje përfundimtare nëse Memushaj mund të vazhdojë përgatitjet apo do t’i duhet të lerë grumbullimin.
Egzon Binaku një tjetër lojtar në listën e trajnerit Reja mund të mos i bashkohet ekipit. Mbrojtësi i Norrkoping ka pësuar një dëmtim në pjesën e gjurit dhe një përgjigje përfundimtare do të mund të jepet vetëm pak testeve mjekësore më të detajuara që do të kryejë lojtari, ndërsa gjatë mbrëmjes me kombëtaren do të bashkohet edhe Mërgim Mavraj, teksa Marash Kumbulla po qëndron me ekipin e Veronës për shkak të impenjimeve që ka skuadra e tij në fazën play-off të Serie B.
