“Ku është finalja e radhës? Në Stamboll? Atëherë prenotoni hotelet, do të jemi atje”, deklaroi Jurgen Klopp pas humbjes 1-0 ndaj Real Madrid, duke motivuar lojtarët e tij dhe tifozët e “The Reds”.
Liverpool humbi në pak ditë titullin kampion dhe finalen e Champions League, duke mos hyrë dot në histori si skuadra e vetme angleze që fiton 4 trofe brenda një sezoni.
Skuadra e Klopp triumfoi më parë në Kupën e Ligës dhe FA Cup. Me humbjen në “Stade de France”, trajneri gjerman regjistroi disfatën e tretë në një finale të Champions League.
54-vjeçari nuk festoi përballë Bayern Munchen në 2013 me Borussia Dortmund dhe dy herë ndaj Real Madrid si teknik i Liverpoolit (2018,2022), duke barazuar Marcello Lippin.
Italiani dështoi si trajner i Juventusit në finalet e viteve 1997, 1998 dhe 2003, respektivisht duke humbur përballë Borussia Dortmund, Real Madrid dhe Milan.
Gjithsesi, Lippi mbetet trajneri i fundit fitues me Juventusin në kompeticionin e më të mirëve. Nën drejtimin e tij, bardhezinjtë mposhtën Ajaksin me penallti në finalen e vitit 1996.
Tani e barazon Jurgen Klopp, që pavarësisht kësaj statistike mbetet një trajner fantastik, i cili ka humbur por edhe ka fituar 10 trofe të rëndësishëm në stolin e Borussia Dortmund dhe Liverpool.
