Vllaznia mes turpit largohej nga Superioreja në fund të sezonit 2017-2018 dhe ndër të tjerë peshën e përgjegjjësisë e morrën mbi shpatulla të ashtuquajturit senatorë, ata që me më shumë përvojë duhet të ishin udhëheqësit e ekipit por që në opinionin e tifozëve shkodran ishin ata që zhgënjyen të parët. Sezoni në purgator përfundoi shpejt dhe Vllaznia u rikthye aty ku i takon në elitën e futbollit tonë dhe sot pikërisht ata senatorë po e drejtojnë këtë skuadër. Renato Malota duket ai i kohës së Partizanit, shumë i fortë në luftën në ajër , pozicional dhe me karakterin e një lider, nuk është rastësi që kuqeblutë nuk kanë pësuar asnjë gol në 4 ndeshjet e fundit. Gilman Lika me shiritin e kapitenit në krah jo vetëm që ka shënuar 4 gola por duket lojtari me më shumë freski, ndërsa show-un po e dhuron Ndriçim Shtubina. Goli i realizuar në Korçë do të jetë pa diskutim në mos më i bukuri një ndër më spektakolarët e sezonit dhe thuajse në çdo fitore të shkodranëve ka qënë e rëndësishme performanca e 32-vjeçarit. Në këtë listë nuk mund të anashkalohet as Behar Ramadani, i cili me rikthimin në shtëpi i ka rikthyer personalitet mesfushës së skuadrës. Pa diskutimeve ka ende vend për t’u përmirësuar dhe kjo lidhet me ndeshjet brenda, në transfertë Vllaznia është ekipi më i mirë i Superiores, në Loro Boriçi e vuan presionin e publikut, nëse edhe ky element largohet atëherë pse jo të mos ëndërrojnë për objektiva madhorë…
