Edhe pse i kritikuar për paraqitjet e dobëta në 3-4 javët e fundit te Dortmundi, klubi “verdhezi” bëri një lëvizje surprise, duke njoftuar rinovimin e kontratës me portierin Roman Burki. Pas shumë kritikave e ardhmja e 26-vjeçarit te Dortmundi ishte vënë në diskutim, por tashmë palët kanë zgjatur bashkëpunimin deri në vitin 2021. Vetë gardiani zviceran u shpreh tepër i lumtur dhe krenar për rinovimin e kontratës, teksa shtoi se do të bëjë gjithçka që me paraqitjet e tij t’ia shpërblejë klubit për besimin e dhënë.
“Rinovimi i kontratës në një moment të vështirë për mua është shumë i rëndësishëm dhe tregon besimin që drejtuesit kanë tek aftësitë e mia. Jam shumë i emocionuar dhe krenar që do të bëj pjesë edhe për shumë vite e këtij ekipi të madh. Do të jap gjithcka për t’ua shpërblyer drejtuesve besimin ndaj meje.”
26-vjecari është prej 3 sezonesh titullar i portës së Dortmundit, pasi u ble në verë të 2015-ës nga Frieburgu.