Rafael Nadal mund të konsiderohet përfundimisht si personazhi i keq i përrallave. Spanjolli i dha fund ëndrrës së Stefanos Tsitsipas, i cili në ditën e 20 vjetorit të tij, dëshironte të fitonte jo vetëm finalen e Rogers Cup, por dhe të mundte tenistin e 5-të që gjendet në 10 më të mirët e botës aktualisht.
Nadal fitoi me rezultatin 6-2, 7-6 në 1 orë e 43 minuta kundrejt grekut, i cili në këtë turne kishte mundur tenistë si Thiem, Djokovic, Zverev dhe Anderson. 20-vjecari ishte shumë pranë fitores në setin e dytë, ku madje kishte dhe një match point, por fatkeqësisht për të, nuk arriti ta shfrytëzonte.
Për sa i përket femrave, Simona Halep fitoi në Montreal, duke mundur amerikanen Sloane Stephens në 2 orë e 39 minuta me rezultatin 7-6, 3-6, 6-4. Kjo ndeshje u konsiderua si një përsëritje e finales së Roland Garros, ku edhe aty Halep pati fituar 2-1 me sete. Trofeu i Rogers Cup ishte i treti në këtë sezon për rumunen, e cila në 2018-ën përveçse në Paris, kishte fituar dhe në Shenzhen të Kinës.
