Përpara finales së femrave në fushën qendrore të Roland Garros-it Philippe Chatrier u kompletua gjysmëfinalja e dytë e meshkujve, pra takimi i shtyrë Thiem – Djokovic. 25-vjecari nga Wiener Neustadt ia doli mbanë për të thyer numrin 1 të botës, duke e privuar kështu tenistin nga Serbia nga kompletimi për herë të dytë në karrierë i të ashtuquajturit Nole Slam, pra fitimit të katër turneve të mëdhenj që plotësojnë Grand Slam-in radhazi, por natyrisht jo brenda një sezoni. Ndeshja ishte ndërprerë me rezultatin 3-1 në favor të numrit 4 të botës dhe me gjendjen e seteve në barazim 1-1, gjithsesi kurioz është fakti se të tre setet që u luajtën ditën e shtunë përfunduan me rezultatin 7-5.
Ndonëse e humbi menjëherë pas rifillimit të takimit epërsinë e një game me break Thiem gjithsesi arriti të fitojë setin e tretë, ndërkaq në setin e katërt Djokovic u kundërpërgjigj, pavarësisht se tenisti austriak dy herë rekuperoi nga disavantazhi i një game me break. Në setin final ndodhi krejtësisht e kundërta dhe ishte kampioni i vitit 2016 që u kthye dy herë nga disavantazhi i një game me break, madje duke i anuluar dy mundësi për ndeshjen kundërshtarit të tij, kur ky shërbente vetë për t’i dhënë fund sfidës.
Dominic Thiem përfitoi nga nervozizmi dhe gabimet e shumta të 32-vjecarit serb, për të fituar në fund gjithë takimin. Kështu në Roland Garros do të përsëritet finalja e edicionit të kaluar Rafael Nadal-Dominic Thiem. Mbreti i fushave me dhe i ka fituar tre ndeshjet ndërmjet tyre në kryeqytetin francez pa humbur asnjë set, sidoqoftë shtatorin e kaluar në Flushing Meadows Thiem e shtrëngoi Rafën në pesë sete, në një takim që zgjati pesë orë, madje tenisti nga Wiener Neustadt është në barazim 2-2 në sfidat e fundit në fushat me dhe, ku natyrisht spikat edhe suksesi në turneun e Barcelonës, me shifrat 6-4, 6-4.