Mady Camara është i përzgjedhuri i Romës për mesfushën. Dëmtimi i Wijnaldum prishi planet e verdhekuqve, që u vunë në kërkim të një tjetër futbollisti për mesfushën dhe kanë zgjedhur të investojnë te 25-vjeçari nga Guinea.
Camara është pjesë e Olympiacos që prej verës së 2018-ës, kur la francezët e Ajaccio, teksa Roma ka arritur marrëveshjen me klubin grek për ta marrë në huazim me të drejtë blerjeje futbollistin.
Olympiacos nuk e ka përfshirë ende mesfushorin 25-vjeçar në listën e Europa Leagues, pasi mediat italiane raportojnë se gjatë ditës së sotme pritet të zyrtarizohet edhe kalimi i tij te Roma, ku do të vihet menjëherë nën urdhrat e Jose Mourinhos.
Mady Camara ka luajtur për një sezon edhe me mesfushorin e Kombëtares Shqiptare, Qazim Laçin, pasi në periudhën 2017-2018 të dy ishin pjesë e Ajaccio në Ligue 2 të Francës.
Më pas Camara u transferua te gjigantët grekë, në një marrëveshje që çoi edhe Laçin te Ajaccio, pasi në atë periudhë kartoni i mesfushorit kuqezi zotërohej pikërisht nga Olympiacos.
