Ditë të bardha për ish-futbollistin e famshëm Brazilian, Rinaldinho, i cili ka lënë ambientet e burgut të kryeqytetit të Paraguait, Asuncion, për të qëndruar në arrest shtëpie në një hotel. Ronnie ishte ndaluar bashkë me vëllanë e tij Roberto de Asis Moreira që më 15 mars nga autoritetet e këtij vendi me akuzën e falsifikimit të dokumenteve (ishin futur në Paraguai me pasaporta të falsifikuara).
Sikurse njoftojnë mediet në Brazil, Ronaldinho dhe vëllai i tij kanë paguar 1.6 milionë euro si garanci për të dalë nga burgu. Dy vëllezërit do të kontrollohen ditë e natë nga policia, që të mos arratisen nga Paraguai.
Arrestimi i Dinhos bëri bujë në mediet ndërkombëtare për faktin se është një personazh shumë i njohur i botës së futbollit. Edhe në kushtet e heqjes së lirisë 40-vjeçari tregoi klasin e tij, duke triumfuar në një turne kalçetoje brenda burgut, por më pas u eliminua në sfidën në çift në futboll-volley, kundër një vrasësi dhe një hajduti.