Cristiano Ronaldo pritet të deklarohet fajtor për evazion fiskal dhe është gati ta bëjë gkëtë gjë më 14 janar, dita kur do të zhvillohet procesi në Gjykatën e Drejtësisë së Madridit. Portugezi do të dënohet me dy vite burg, por sipas mediave spanjolle futbollisti i Juventus do të paguajë një gjobë prej 375 mijë eurosh dhe do t’i shpëtojë burgut.
Kjo do të jetë mbrojtja që do të bëjë avokati José Antonio Choclán, i cili ka pasur një rast të ngjashëm me Fabio Coentraon, ish-shok skuadre i Ronaldos, qoftë tek Reali, apo dhe tek kombëtarja portugeze. Njësoj si Coentrao, 5 herë fituesi i Topit të Artë nuk do të jetë I pranishëm fizikisht në Madrid, por do të marrë pjesë në seancë me anë të një videokonference.
Për të mos u harruar është fakti se 33-vjeçari ka arritur më 6 gusht një marrëveshje me shtetin spanjoll për pagesën e një gjobe prej 13.4 milionë eurosh, për të mbyllur përfundimisht çështjen e evazionit. Por tani është thirrur për t’u përballur me procesin penal, që vijon ende. Gjithsesi, nuk pritet të ketë probleme të mëtejshme për CR7, i cili ka dhe akuza të tjera nga SHBA, për dhunë seksuale ndaj Kathryn Mayorgan. Aktualisht, portugezi po kalon një formë fantastike me Juventusin, ku ka shënuar 10 gola në kampionatin italian deri më tani.
