Mbrojtësi i majtë i Tottenhamit, Denny Rose ka rrëfyer se i është dashur të kërkojë ndihmën e psikologut për të kaluar momentet e vështira që përjetoi në 8 muaj jashtë fushës së blertë. Anglezi pësoi një lëndim serioz në gju, që i kushtoi një ndërhyrje kirurgjikale në muajin Maj dhe si pasojë një kohë të gjatë rikuperimi.
Ishte ndeshja e të dielës kundër Crystal Palace, që e riktheu titullar 27 vjeçarin, i cili ka qenë jo aktiv që nga muaji Janar i këtij viti. Pas kësaj paraqitjeje, mbrojtësi i “gjelave” është shprehur se u ndie i rilindur në stadiumin “Wembley”.
I pyetur për vështirësitë e lëna pas, futbollisti foli pa rezerva për gjendjen e tij psikologjike të asaj periudhe. Rose zbuloi se për të, 8 muajt e shkuar kanë qenë më të vështirët e jetës së tij, pasi kaloi një gjendje jo të mire emocionale, i pushtuar nga ndjenjat e zemërimit dhe xhelozisë.
Ai shtoi se i trembej mundësisë për të mos u rikthyer më në formën e mëparshme, e megjithatë thekson se ia doli mbanë. Lojtari i Spurs-ave shton se ndihma e psikologut dhe librat e kanë ndihmuar t’i shohë gjerat me pozitivitet. Pavarësisht gjithçkaje, kjo eksperiencë e hidhur i ka mësuar 27 vjeçarit se sa e rëndësishme është të shprehesh me njerëzit dhe të jesh i hapur ndaj opinioneve të tyre.
Futbollisti nuk la pa përmendur dhe vlerësuar mbështetjen e 2 trajnerëve të tij, Mauricio Pochettino dhe atij të kombëtares angleze, Gareth Southgate. Ky i fundit u tregua mjaft i guximshëm duke e bërë pjesë të formacionit mbrojtësin e majtë, pavarësisht faktit se ka bërë vetëm 3 paraqitje pas rikthimit.
