Kosova nuk do të ketë kontributin e Amir Rrahmanit për ndeshjet e para kualifikuese të Botërorit, kundër Suedisë dhe Spanjës. Mbrojtësi “dardan”, sikurse njoftohet nga Federata e Futbollit e Kosovës, nuk mund të riaftësohet në kohë nga lëndimi që ka pësuar së fundmi, e për rrjedhojë ka lënë grumbullimin për ta vijuar fazën e riaftësimit në klubin e tij.
“Mbrojtësi i Kombëtares së Kosovës, Amir Rrahmani është larguar nga kampi i “Dardanëve”, në pamundësi për të kontribuuar në tri ndeshjet e këtij muaji për shkak të lëndimit. Përkundër vullnetit dhe dëshirës së madhe që të riaftësohet për lojë, një gjë e tillë ishte e pamundur, prandaj Rrahmani do të kthehet në klubin e tij, Napoli, për të vazhduar fazën riaftësimit.
Federata e Futbollit e Kosovës uron që Amiri sa më parë të rikthehet në fushën e gjelbër dhe të jetë në dispozicion të Kombëtares në sfidat e ardhshme.”
