Futboll

Rrëfehet talenti Vrioni: Debutim ëndrrash me Shqipërinë U-21, babai….

Ai i Giacomo Vrionit, 19-vjeçarit të talentuar shqiptar me përfaqësuesen Shpresa ishte një debutim ëndrrash. Gol që në ndeshjen e parë dhe pikërisht ndaj Italisë me të cilën ka luajtur me kombëtaret U-18 dhe U-19. Sulmuesi i cili është në pronësi të Sampdorias por aktualisht luan si i huazuar te Venezia në Serie B, nuk i ka fshehur emocionet për golin e tij të parë me fanellën e kombëtares së 21-vjeçarëve të Shqipërisë në një intervistë për mediat italiane.

“ Ia dedikoj golin babait tim Arben i cili ka qarë nga gëzimi në momentin që unë kam shënuar. Ai dhe mamaja ime janë shqiptarë dhe për mua të vishja fanellën e shtetit ku ata kanë lindur ishte një kënaqësi e papërshkrueshme. Grumbullimi me kombëtaren shqiptare të 21-vjeçarëve nuk ishte një surprizë për mua, edhe vitin e kaluar kam patur shumë kontakte me ta por vendosa të pres. Kam dy pasaporta shqiptare dhe italiane dhe më herët kisha arritur të gjeja rrugën e rrjetës edhe me përfaqësueset e moshave U-17 dhe U-19 të Italisë. Të debutoja në të tillë mënyrë me gol ndaj Italisë ishte si një ëndërr për mua. Jam vërtetë shumë i lumtur tashmë shpresoj të shënoj në ndeshjen e radhës ndaj Beneventos pasi dua t’u dhuroj kënaqësi edhe tifozëve të Venezias”.

Të luash në një skuadër që pretendon vendet e para të Serie B në moshën 19-vjeçare nuk është pak. Për Giacomo Vrionin parashikohet një e ardhme e ndritur dhe nëse bën mirë me përfaqësuesen Shpresa të Shqipërisë gjatë viteve në vazhdim mund të vijë edhe grumbullimi në përfaqësuesen e madhe.

To Top