Intervista e sulmuesit Armando Sadiku, dhënë për emisionin “Kuqezi”, në Supersport, pas ndeshjes që Shqipëria humbi me rezultatin 0-2 ndaj Turqisë, në “Loro Boriçi”.
Pse skuadra çaloi në sulm?
E nisëm mirë ndeshjen dhe patëm 2-3 raste, që nuk i shfrytëzuam. Ne jemi Kombëtare e vogël dhe nuk mund të kemi luksin të shpërdorojmë 2-3 raste. Më pas u ndëshkuam dhe kundërshtari ia doli të menaxhojë mirë lojën.
Ju kishte munguar shumë kombëtarja. A e kishit menduar një rikthim me humbje?
Jo, e kisha menduar rikthim me fitore dhe me gol të shënuar. Mezi prisja të rikthehem dhe doja shumë të shënoja dhe të festoja.
U aktivizuat në momentin kur loja ishte thuajse e fikur. Sa e vështirë ishte për ta rindezur?
Ishte shumë e vështirë, pasi kur u futa në fushë, turqit e menaxhonin mjaft mirë lojën, duke ulur ritmin. Kjo bëri që të humbnim besimin dhe të mos reagonim dot.
