Hamdi Salihi është një nga ndihmësit e trajnerit Edi Reja, ndërsa në prag të sfidës me Lituaninë dha një prononcim të shkurtër për Supersport, ku shpjegoi ndryshimet në formacion dhe vështirësitë e përgatitjes së ndeshjes.
Keni bërë nga një ndryshim për çdo repart…
Duke parë edhe gjendjen fizike të secilit lojtar, trajneri ka menduar të freskojë skuadrën. Ndoshta do të ishte mirë të zëvendësonim edhe më shumë, por nuk donim të prishnim fizionominë e ekipit. Kemi parasysh që këto ndeshje janë të vështira për t’u përgatitur, ndaj duhet të shmangim çdo pakujdesi.
Si është gjendja e ekipit?
Kjo është pjesa më e vështirë, pasi një pjesë e mirë e futbollistëve kanë ardhur këtu nga pushimet, duke qenë se nuk e kanë nisur ende kampionatin. Veçanërisht me futbollistët që luajtën në Bjellorusi, na është dashur të punojmë shumë për t’i rikuperuar edhe për sonte.
Përveç Laçit, a ka një plan edhe për aktivizimin e Brojës e Çepeles?
Jo nuk ka një plan konkret, pasi do të shohim si do rrjedhë ndeshja, por mund të them se të gjithë futbollistët që janë në pankinë, kanë mundësi të luajnë sonte.