Mario Mandzukic duket se po kalon orët e fundit në qytetin e Torinos, pasi lajmet më të fundit nga mediat italiane flasin për kroatin që po negocion një largim drejt kampionatit të Katarit, i vetmi ku merkatoja nuk është mbyllur ende dhe do të vazhdojë deri më 30 shtator.
Sulmuesi 33-vjeçar nuk bën pjesë në planet e Sarrit dhe fillimisht u la jashtë listës së Champions leagues, ndërsa për ndeshjet e kampionatit është alternativa e tretë, pas Higuain dhe Dybalës, ndaj për këtë arsye po mendon seriozisht largimin.
Në moshën 33-vjeçare, Mandzukiç sheh Katarin si një mundësi mjaft të mirë për të përmirësuar të ardhurat e tij, pasi do të mund të merrte një pagë të majme, ndaj ka autorizuar menaxherët e tij që të çojnë përpara negociatat.
Momentalisht nuk është zbuluar asnjë emër konkret, por Maurizio Sarri ka lënë Mandzukiç jashtë listës së të grumbulluarve për ndeshjen e nesërme ndaj Fiorentinës dhe burime pranë klubit thonë se ky vendim ka ardhur për shkak te negociatave të merkatos.
