Normalisht, merkatoja duhej të sillte ndonjë lojtar më shumë, por Ardjan Memës i duhet ta nisë kampionatin me një sulmues më pak. Nuk bëhet fjalë për shitje, largime apo dhe më keq, dëmtim, është thjesht Yunus Sentamu. Edhe këtë herë ka preferuar avazin e vjetër, vonesën e kthimit nga pushimet, qofshin ato të verës apo dimrit.
E sigurt është se Sentamu nuk do të kthehet në kohë për përgatitjet me skuadrën. Faza përgatitore po përfundon, të mërkurën është një ndeshje kupe me Flamurtarin, ndërsa e diela sjell për bardheblutë rikthimin në kampionat me Kamzën, por 24-vjeçari nga Uganda ende nuk është vënë në dispozicion të skuadrës. Futbollisti i ka komunikuar klubit se ka probleme me dokumentacionin, por mungesa e tejzgjatur nuk mund të tolerohet nga drejtuesit, që e kanë gjobitur futbollistin për herë të dytë për të njëjtin motiv, mosrespektimin e afateve të kthimit në skuadër.
Vonesat e Sentamut janë kthyer tanimë në një ritual. Verën e kaluar kthimi me vonesë e penalizoi për të qenë në formën optimale që me fillimin e kampionatit, kështu ndodhi edhe janarin e shkuar, një telenovelë që vazhdon edhe këtë 2019. Një problem më vete për Memën, që nuk mund të ketë në formën optimale një element të rëndësishëm për bardheblutë në rifillimin e kompeticioneve zyrtare.