Sevilla nuk ndalet në merkato. Pasi afroi mbrojtësin Wobber nga Ajaxi dhe sulmuesin Munir El Haddadi nga Barcelona, andaluzët mendojnë për përforcimin e skuadrës për sezonin e ardhshëm. Spanjollët kanë prenotuar vizitat mjekësore për sulmuesin e Salzburgut, Munas Dabbur, i cili do të transferohet në verë në Spanjë. Sulmuesi izraelit pëlqehej edhe nga Liverpooli, por duket se Sevilla ka përshpejtuar tratativat për transferimin e tij. 26-vjeçari është golashënuesi më i mirë në Europa League deri tani, me 6 gola dhe kryeson renditjen e golashënuesve edhe në Kampionatin Austriak me 9 gola.
“Akand” për Jean-Kevin Augustin
Everton, Wolves dhe Southampton po kërkojnë të nënshkruajnë sulmuesin e Leipzig Jean-Kevin Augustin. 21-vjeçari arriti të shënonte 12 gola në sezonin e kaluar për ekipin nga Bundesliga, por këtë vit ai e ka humbur vendin në formacion nga Yussuf Poulsen. Sipas asaj që shkruajnë mediat, edhe Leipzig do ta lejonte largimin e francezit, por vetëm për një shumë jo më të ulët se 38 milionë paundë. Augustin u transferua te Leipzig në verën e 2018 nga PSG, ndërkohë që ka një kontratë që përfundon më qershor 2022.