Kukësi po mbyll një sezon për t’u harruar në aspektin sportiv, pasi për herë të parë pas shumë vitesh, skuadra nuk do të garojë në ligat europiane, megjithatë verilindorët kanë plane ambicioze për të ardhmen.
Gjithçka fillon me rikthimin në shtëpi, pasi punimet në stadiumin “Zeqir Ymeri” po vijojnë me ritme të shpejta dhe optimizmi në kampin verilindor është i madh për të nisur sezonin e ri pikërisht në impiantin e ri.
Siç njoftohet nga klubi i Kukësit, është porositur tapeti i fushës, që do të jetë i gjithi bar natyral, ashtu siç janë porositur edhe stolat për shkallët e stadiumit dhe impiantit i ndriçimit, që do të lejojë edhe zhvillimin e ndeshjeve në mbrëmje.
Aktualisht po u jepet dora e fundit punimeve në tribuna dhe shumë shpejt pritet të nisë montimi i barit, stolave, sistemit të ndriçimit dhe komoditeteve të nevojshme në ambientet e brendshme të “Zeqir Ymerit”, me qëllim që Kukësi ta nisë sezonin e ri në shtëpi të re.
