Sfida e fundit në “Kukës Arena”, ekipi i Longos për suksesin e radhës
Kukësi luan për herë të fundit në shtëpi këtë sezon dhe përballë do të ketë Skënderbeun, skuadrën që ka “prerë” biletën për në Kategorinë e Parë.
Verilindorët janë ende në ethet e zonën europiane dhe në këtë javë të 35-të do të kërkojnë fitoren e dytë radhazi në shtëpi pas suksesit ndaj Dinamos, por gjithashtu, do të kërkojnë të dytën radhazi në kampionat pas shkurtit.
Skuadra e Diego Longo-s renditet në vendin e katërt me 49 pikë, ndërsa në pesë javët e fundit ka grumbulluar vetëm katër pikë, por gjithsesi mbetet në pjesën e sipërme të renditjes dhe në lojë për objektivin “Europë”.
Përballë korçarëve, Kukësi do të ketë në dispozicion edhe Jorgo Pëllumbin i cili është rikthyer të jetë i gatshëm, pas pezullimit për shkak kartonësh.
Me “halle” të reja, Skënderbeu është vetëm një vizitor në minutat e fundit të këtij sezoni, me korçarët të cilët janë në “turin” përshëndetës me elitën pas 13 vitesh. Skuadra e Licit vjen pas disfatës në shtëpi me Laçin, një humbje e cila erdhi me përmbysje, ndërsa pritet të ketë përsëri risi në formacion, me Skënderbeun që po provon elemente të rinj, si një test për sezonin e ri.
Korçarët mbyllin klasifikimin, në vendin e 10-të me 25 pikë, ndërsa në pesë javët e fundit kanë të njëjtin rendiment si kundërshtari i kësaj jave, duke koleksionuar katër pikë. Ajo që vlen për t’u theksuar është fakti se, Skënderbeu rrezikon ta mbyll sezonin pa asnjë fitore në transfertë, pasi deri tani numëron 7 barazime dhe 10 humbje.
Në këtë sezon, kjo përballje i ka dhuruar të tre rezultatet, një fitore për Skënderbeun, një barazim dhe një fitore për Kukësin, ndërsa korccarët rikthen pas shumë vitesh të luajnë në transfertën “e vërtetë”, në Kukës.
Eventet Sportive në SuperSport
