Drita e Gjilanit zbriti në fushë pasditen e sotme për të luajtur sfidën e parafundit të kampionatit, të cilën e fitoi me rezultatin minimal 1-0 përballë Drenicës dhe tani është vetëm një hap larg kurorëzimit si kampione e IPKO Superligës.
Skuadra nga Gjilani vinte pas humbjes në derbi fundjavën e kaluar dhe pritej me interes reagimi i saj përballë një kundërshtari që luan për mbijetesën në Superligë, ndërsa megjithëse pa shumë shkëlqim, “Intelektualët” ia dolën të marrin 3 pikët në këtë takim.
Fati i sfidës u vendos në minutën e 49’ të saj, kur Astrit Fazlliu shërbeu saktë për Xhevdet Shabanin, i cili ia doli të dërgojë topin në rrjetë, duke shënuar golin që i dha tre pikët skuadrës gjilanase.
Me këtë fitore Drita ruan vendin e parë, por tani e shkëputur me 4 pikë nga Gjilani e 5 pikë nga Ballkani, të cilat do të përballen me njëra-tjetrën nesër në orën 17:00, në një sfidë që do të vendosë shumë sa i përket rrugës drejt titullit kampion. Kujtojmë që ndeshja e fundit e Dritës do të zhvillohet në transfertën e Suharekës përballë Ballkanit.