Xherdan Shaqiri “thumbon” me një dhuratë të veçantë ish-mbrojtësin e Manchester United, Gary Neville, i cili është kritiku më i madh i futbollistit shqiptar, që kur ai nënshkroi me “The Reds”.
Neville humbi një bast me Jamie Carragher, një ish-futbollist të famshëm të Liverpoolit, me të cilin bën rolin e analistit komentatorit sportiv në Sky Sports e për rrjedhojë duhet të veshë fanellën e të kuqve.
Xherdan Shaqiri, përfitoi nga ky rast duke i dërguar fanellën e tij me numër 23, ku kishte lënë edhe një mesazh thumbues: “Fansit tim numër 1, Gary-t. Të lutem, mos e kthe mbrapsht.”
Mbetet për t’u parë nëse Neville do ta ulë “hundën” para kësaj sfide, pasi që kur Shaqiri firsmoi për Liverpoolin, ai nuk i ka kursyer kritikat, madje duke e tepruar me komentet e tij kundër shqiptarit.
Neville e humbi bastin me Carragher, ndërsa po i gjuanin njëri-tjetrit 11-metërsha. Ish-mbrojtësi i United këmbëguli për të vënë një bast dhe kolegu i tij i Liverpoolit i kërkoi që, nëse do të humbiste, të vishte fanellën e kuqe. Në këtë rast përfitoi Shaqiri, që i dërgoi fanellën e tij dhe me një mesazh ironizues.
