Reali i Madridit fitoi 3-2 në “Santiago Bernabeu” ndaj Malagas në një sfidë ku Cristiano Ronaldo u bë protagonist në fund me një 11-metërsh të realizuar me vështirësi, pas ndërhyrjes së portierit, duke u dhënë tri pikë “Los Blancos”. Dy herë barazuan andaluzianët, por pa mundur të shmangnin humbjen ndaj kampionëve në fuqi të La Ligas.
Goli i Karim Benzema që në minutën e 9-të dha përshtypjen e një fitoreje të lehtë për madrilenët, por në të 18-ën Rolan, i pambuluar në zone, ktheu baraspeshën në rezultat.
Casemiro kërceu bukur me kokë për golin e 2-1, ndërsa në pjesën e dytë Malaga gjeti forca për të reaguar, duke e befasuar skuadrën e Zidane me golin e 2-2, që mban firmën e Catros.
Pas një presioni të gjatë dhe të vazhdueshëm Modric fitoi 11-metërsh, që u mor përsipër nga Ronaldo. Portieri Jimenez ia kuptoi krahun, por topi shkoi sërish në këmbët e portugezit, që shënoi golin e fitores.
Atletico e Madridit i shkaktoi një humbje të rëndë Levantes në fushën e kësaj të fundit, me “Los Colchoneros” që rifitojnë shumë shpejt vendin e tretë, duke mbajtur një pozicion më poshtë pikërisht Realin. 0-5 përfundoi ky takim në komunitetin valencian, me Gameiron dhe Griezmann që raelizuan nga një dygolësh, finalizime që u shtohet edhe autogoli i Rober që në minutën e 5-të.
Ndërkohë, Alaves që drejtohet nga Giani De Biasi pësoi humbjen e radhës 1-2 në shtëpi ndaj Eibarit, ndërsa Betisi barazoi 2-2 me Gironan.
