Romelu Lukaku dhe Nicolo Barella ishin autorë të një gjesti të shëmtuar në ndeshjen e fundit të kampionatit ndaj Sampdorias. Sulmuesi ishte ai që inicioi një debat në fushë me shokun e skuadrës, për arsye se nuk i pëlqeu reagimi i mesfushorit. Megjithatë, ai që u duk si një debat i ashpër me belgun që nuk kursey edhe disa fjalë të rënda, u shua shpejt.
Madje, në dhomat e zhveshjes pas përfundimit të pjesës së parë me Sampdorian, dyshja u ul afër njëri-tjetrit si për t’i dhënë një mesazh trajnerit Simone Inzaghi se gjithçka ishte sqaruar. Gjithsesi, lojtarët nuk i shpëtuan dot një leksioni nga ana e teknikut i cili ia bëri të qartë futbollistëve se nervat janë normale në lojë, megjithatë profesionistët duhet të jenë të aftë t’i menaxhojnë ato për të mos vepruar më pas gabim në sytë e të gjithë tifozerisë.
Nga ana tjetër, edhe klubi duke parë se çështja u zgjidh shpejt, ka vendosur të mos marrë asnjë masë ndaj Barellës dhe Lukakut, të cilët tashmë në të ardhmen duhet të tregojnë më shumë vetëkontroll.
