Ish trajneri i atletit të famshëm Mo Farah, Alberto Salazar u skualifikua për një periudhë 4-vjeçare nga ky sport, për shkelje të rënda që lidhen me dopingun. I lindur në Havana, 61-vjeçari me nënshtetësi amerikane mori famë në fillimin e viteve ’80, kur fitoi tre herë radhazi Maratonën e New York-ut dhe triumfoi gjithashtu edhe në maratonën e Bostonit, sidoqoftë ish-atleti me origjinë kubaneze u përzgjodh për të drejtuar projektin stërvitor të atletit të famshëm britanik nga 2011 deri në vitin 2017.
Vendimi u mor pas një hetimi 4-vjeçar nga USADA, Agjencia e Anti-Dopingut e Shteteve të Bashkuara, si dhe betejave të panumërta në gjykatë, për më tepër me dyer të mbyllura që zgjatën plot dy vjet. Pas shpalljes së këtij vendimi Alberto Salazar u shfaq i habitur dhe deklaroi se do të apelojë kundër një përfundimi të tillë, sipas tij krejtësisht të padrejtë.
Po me 4 vite u skualifikua gjithashtu edhe Jeffrey Brown, doktor endokrinolog që ka trajtuar në mënyrë të veçantë një pjesë të mirë të atletëve që stërviste Alberto Salazar. Mo Farah u nda përfundimisht nga Salazari në 2017, pikërisht vitin kur edhe USADA ngriti akuzat e para kundër tij. Pas ndëshkimit të ish-trajnerit të tij, Mo Farah u shfaq i çliruar për mbylljen e çështjes nga USADA dhe skualifikimin 4-vjeçar.
Atleti i famshëm me origjinë nga Somalia shprehu kënaqësinë e tij për këtë dënim, duke shtuar se gjatë gjithë karrierës së tij nuk ka toleruar asnjë shkelje të rregullave apo dhe procedurave të antidopingut. Në fakt 36-vjeçari i lindur në Mogadishu nuk ka rezultuar pozitiv në asnjë nga testet e shumta që i janë bërë gjatë gjithë karrierës së tij të lavdishme. Një panel i pavarur vërtetoi se Alberto Salazar bashkë me Dr. Jeffrey Brown fillimisht ishin në zotërim të substancave të ndaluara dhe më pas kjo dyshe u mor me trafikimin dhe administrimin e tyre, mbi të gjitha duke përmirësuar performancën e atletëve nëpërmjet ndërhyrjeve mjekësore, që kishin për qëllim kryesisht rritjen e nivelit të testosteroneve.
Drejtuesi i USADA-s Travis Tygart falënderoi atletët që patën kurajon për të folur dhe për të rrëfyer të vërtetën. Mo Farah është vetëm një nga atletët e stërvitur në të kaluarën nga trajneri i famshëm Alberto Salazar dhe sportisti me origjinë somaleze që numëron 6 tituj botërorë dhe 4 medalje të arta në Lojërat Olimpike, në garat e 5.000 dhe 10.000 metrave u tërhoq nga ky sport në vitin 2017, pak përpara se të nderohej për kontributin e tij me titullin Sir nga vetë Mbretëresha, për t’u përqendruar thjesht në disiplinën e maratonës, gjithsesi atleti britanik në fillim të vitit 2019 nuk e përjashtoi një rikthim të mundshëm në garat e atletikës për Olimpiadën e Tokios, që do të zhvillohet pikërisht vitin e ardhshëm.