Pas shitjes së Merveille dhe Acquah gjatë merkatos së verës, Tirana ka gjetur një tjetër xhevahir për të tashmen e skuadrës, por edhe për të ardhmen e arkave të klubit. Mesfushori Tony Maveje është shpërblyer për startin fantastik të sezonit me bardheblutë. Paraqitjet e shkëlqyera të 30-vjeçarit kanë bërë që ai të mbetet pjesë e përfaqësueses së Ugandës.
Klubi kryeqytetas njoftoi se Maveje është larguar nga Shqipëria për t’iu bashkuar skuadrës së vendit të tij në grumbullim për dy sfidat kualifikuese që Uganda do të luajë përballë Ganës dhe Kongos. Vetëm pak muaj pas transferimit të tij te Tirana, Tony Maveje është kthyer në një prej elementëve më të rëndësishëm të skuadrës së drejtuar nga Ze Maria.
Mesfushori debutoi me fanellën bardheblu më 6 Shtator, në finalen e Superkupës së Shqipërisë të fituar përballë Kukësit, ndërsa e nisi kampionatin me gol, duke i dhënë ekipit fitoren minimale përballë Ilirisë.
