I kënaqur për fitoren pasi Europa tashmë është më afër për Teutën e tij, trajneri i durrsakëve Bledi Shkëmbi e analizoi kështu në intervistën për Supersport fitoren 2-0 ndaj Partizanit.
“Kryesorja është që morëm 3 pikët.Gjatë gjithë javës kemi punuar për të qenë seriozë. Ndeshjet e tjera dolën ashtu siç na interesonte. Gjithsesi ka edhe 2 ndeshje të tjera”.
Përshëndetja e Partizanit…
Personalisht mendoj që kampionët duhet të respektohen. Ato 90 minuta mund të jenë luftë, por për mendimin tim, aty ka mbaruar çdo gjë. Partizani e meritonte, është ekipi kampion, të gjithë ne duhet ta respektojmë.
Ecuria në javët e fundit…
Jam i bindur që do të vazhdojmë me rezultatet pozitive. Kemi kaluar problemin psikologjik. E kaluam duke u stërvitur shumë, por edhe me fat. Gjithmonë për të kaluar një situatë të vështirë në futboll të duhet edhe pak fat. Në këtë ndeshje e kemi pasur.
Pikat e dobëta dhe të forta të skuadrës…
Kemi dhe 2 ndeshje shumë të vështira për të luajtur, duhet të mbarojmë edhe këto 2 ndeshje, më pas klubi do të mundohet të bëjë afrimet e duhura për të qenë sa më të fortë në kupat e Europës.
