Vetëm një ditë pas afrimit të nigerianit Wakili, Shkëndija e Tetovës zyrtarizon edhe Visar Musliun. Mbrojtësi qendror vjen te Shkëndija në formë huazimi nga radhët e Prishtinës, me opsion blerjen e kartonit të plotë të lojtarit në fund të sezonit aktual.
23-vjeçari, i dalë nga shkolla e futbollit të Gostivarit, përmes Renovës, nga një sezon ishte pjesë e Sent Gallenit të Zvicrës dhe Vardarit të Shkupit. Paraqitjet bindëse e kanë bërë pjesë e gjithë përfaqësueseve të reja të Maqedonisë. Ishte pjesë e suksesit historik me U-21 në Kampionatin Europian për të rinjë në Poloni, ndërsa u konfirmua titullar në përfaqësuesen A në fund të eliminatoreve për Botërorin “Rusi 2018”.
Musliu është futbollisti i gjashtë që bashkohet me Shkëndijën e Tetovës në këtë afat kalimtar, afrim që mbyll merkaton e kuqezinjëve për gjysmësezonin pranveror, ku kërkohet titulli i kampionit.