Shkëndija e Tetovës ka pësuar humbjen e parë në kampionatin maqedonas, teksa është mposhtur në mënyrë të befasishme në shtëpi nga Pobeda, me rezultatin 0-2.
Në Tetovë kuqezinjtë e Qatip Osmanit u befasuan nga miqtë, të cilët pasi mbajtën sfidën në barazim në pjesën e parë, arritën të shënojnë dy herë në 45-minutëshin e dytë.
Tashmë Shkëndija përfundon përkohësisht në vendin e tretë, duke i dhënë mundësi Vardarit të shkëputet me tre pikë në krye të renditjes, falë fitores së sotme me rezultatin 1-0 ndaj Sileksit.
Shkëndija është skuadra kampione në fuqi në Maqedoni, teksa sezonin e kaluar fitoi gjithçka, ndërsa këtë vit synon të ruajë fronin, ndonëse në 7 javët e para numëron 4 fitore, 2 barazime dhe një humbje, dhe duket larg formës së disa muajve më parë.