Pas humbjes me Bosnje Hercegovinën, përfaqësuesja Shpresa kthehet në fushë për të parin nga dy testet me Bjellorusinë. Skuadra e drejtuar nga trajneri Alban Bushi do të ketë një fytyrë krejt ndryshe nga përballja e 28 majit.Kjo edhe sepse kontingjenti ka pësuar ndryshime të rëndësishme. Nga kapiteni Bare, portieri Selmani apo Hebaj dhe talenti i Standard Liezhit, Selahi që janë disa prej emrave të cilët u lanë pushim.
Në ekip janë afruar 17 futbollistë të rinj, të cilët do të testohen, ndërsa me ekipin rikthehet Taulant Seferi. Një shans i mirë për të gjithë për të treguar cilësitë që zotërojnë dhe për të bindur trajnerin Bushi se mund të jenë alternativa për edicionin e ri.Nga lojtarët e afruar, mbi të gjithë në qendër të vëmendjes janë disa emra të përveçëm. Nga Shefit Shefiti i Shkëndijës së Tetovës zgjodhi të luajë për Shqipërinë, për të vijuar me Laorent Shabanin, i cili aktivizohet te Malmoe dhe që ka luajtur me 19-vjeçarët e Suedisë.
Një tjetër element i cilit do të vëzhgohet me kujdes është edhe Sebastian Spahiu, që luan me Muskronin në Superligën belge dhe cilësohet një talent i perspektivës. Vëmendja në ndeshjet e 5 dhe 8 qershorit ndaj Bjellorusisë do të jetë pikërisht te Shefiti, Shabani dhe Spahiu, që së bashku me talentin Selahi shihen si yjet e Kombëtares së 21-vjeçarëve për edicionin e ardhshëm. Sfida e parë ndaj 21-vjeçarëve bjellorusë do të luhet këtë të martë në orën 19:00 në “Elbasan Arena”.