Kombëtarja shqiptare U-19 mbylli sot fushatën eliminatore të Europianit 2019 me ndeshjen e luajtur në “Niko Dovana” ndaj Norvegjisë, ndaj të cilës u mposht me rezultatin minimal 0-1.
Skuadra e drejtuar nga Erjon Bogdani kishte shanse minimale për t’u kualifikuar, po kërkonte të mbyllte me fitore këtë edicion, pasi ishte mposhtur më herët nga Ukraina dhe Sllovakia.
Gjithsesi mjaftoi një gabim i qendërmbrojtësit të Skënderbeut, Enes Isufi në minutën e 31-të të pjesës së parë, që kuqezinjtë të mposhteshin minimalisht 0-1 ndaj nordikëve.
Në minutat në vijim, kuqezinjtë e Bogdanit tentuan të rikthejnë baraspeshën, por nuk ia dolën të shënojnë gol në portën e norvegjezëve, ndërsa rezultati mbeti i pandryshuar.
Kështu kuqezinjtë mbyllën fushatën eliminatore të Europianit 2019 me 3 humbje në po kaq ndeshje, ndërsa statistikat bëhen edhe më negative, kur llogarit që Kombëtarja U-19 ka pësuar 5 gola dhe nuk ka shënuar asnjë.