Federata Shqiptare e Futbollit ka njoftuar sot të gjithë klubet, se për shkak të situatës së krijuar me përhapjen me shpejtësi të koronavirusit, UEFA ka shtyrë afatin e licencimit të klubeve që pretendojnë të marrin pjesë në Kupat e Europës.
Kështu afati i parë ishte përcaktuar deri më 31 mars, ndërsa tani është shtyrë deri më 30 prill, me qëllim që klubet të kenë mundësi të përgatisin më mirë dhe më saktë dokumentacionin e nevojshëm.
Të gjithë klubet që aspirojnë të marrin pjesë në Kupat e Europës, përveçse duhet ta arrijnë këtë në renditjen e kampionatit, duhet të marrin edhe licencën nga UEFA, që lidhet me plotësimin e disa kushteve paraprake.
Të gjithë klubet e Kategorisë Superiore që duan të licencohet për një vend në Kupat e Europës, do të duhet të dorëzojnë dokumentacionin në FSHF deri më 30 prill dhe më pas të shpresojnë që të fitojnë të drejtën për të luajtur në kupat europiane nëpërmjet renditjes apo triumfit në Kupën e Shqipërisë.
