Nuk nxorri fitues, por ngjalli shumë polemika, përplasja më e fortë e javës së 9-të të Kategorisë Superiore mes Flamurtarit dhe Kukësit, e cila ishte edhe një sfidë direkte për vendin e dytë. Përfundoi 1-1 kjo ndeshje përbmyllëse e kësaj jave, që u luajt në një atmosferë të akullt në stadiumin “Flamurtari”, ku mungonin tifozët për shkak të dënimit të marrë nga Komisioni i Disiplinës.
Kampionët në fuqi të Superiores u shfaqen cinikë, sidomos në pjesën e parë, kur Bakaj në të 37-ën ekzekutoi saktësisht një goditje dënimi. Por vetëm kaq, sespe Flamurtari hyri në fushë me një tjetër motivim në pjesën e dytë, derisa gjeti golin e barazimit me Bushic në minutën e 73-të, pas krosimit të Zhufos.
Momenti më i diskutueshëm i sfidës ishte ai i kohës shtesë, kur Zhufo realizoi direkt nga goditja e lirë, por për anësorin ishte pozicion jashtë loje i Mustës, që duket qartë që merr pjesë në aksion, por nuk e prek topin. Ky rezultat i shkon përshtat Skënderbeut, që e sheh rivalin më të afërt, Kukësin, me shtatë pikë më pak në tabelën e renditjes në përfundim të fazës së parë.
Skënderbeu i bën një mbyllje perfekte fazës së parë të Kategorisë Superiore, me 8 fitore e 1 barazim dhe kryeson bindshëm renditjen me 25 pikë.
Korçarët kanë arritur të mposhtin edhe Vllazninë, me rezultatin 2-0, në një takim ku gjithçka u vendos në pjesën e dytë. Fillimisht ishte tiranasi Afrim Taku që i dha avantazhin Skënderbeut në minutën e 56’, ndërsa Ali Sowe dyfishoi shifrat në të 83-ën.
Takimi i luajtur në Korçë prodhoi një ndeshje me ritëm shumë të ulët, përveç 10 minutave të fundit, ndërsa te Skënderbeu ndihej edhe lodhja e 90-minutëshit të Beogradit.
Nga ana tjetër shkodranët e Gjokës, ndonëse vinin pas një rezultati fantastik në Kukës, nuk arritën të bëjnë të njëjtën gjë ndaj kryesuesve, pavarësisht dëshirës së treguar në fushë.
E nëse Skënderbeu e mbyll në mënyrë perfekte këtë fazë, nuk mund të thuhet e njëjta gjë për Vllazninë, që pas 9 javësh renditet në vendin e parafundit me vetëm 6 pikë, duke lënë pas vetëm Lushnjën me 5 pikë.