Skënderbeu nuk ndalet më, fiton 0-2 në Gjirokastër dhe kap përkohësisht kreun e renditjes në pritje të supersfidës së javës Kukësi-Partizani. Bardhekuqtë e Shehit ishin shumë të fortë për Luftëtarin e Gentian Mezanit që këtë herë u dorëzua në shtëpi. Edhe pse zhvilloi një pjesë të parë të mirë në të cilën shpërdoroi dhe një rast të artë me Shkurtajn, Luftëtari ishte i pafuqishëm për ti bërë ballë forcës së Skënderbeut në pjesën e dytë. Bluzinjtë u ndëshkuan në minutën e 68-të nga Ardit Hoxhaj i cili kishte vetëm 3 minuta që kishte hyrë në fushë në vend të ish të madh të sfidës Dejvi Bregu. Fitoren e Skënderbeut e vulosi Bruno Dita në minutën 81-të me një gol shumë të bukur. Me këtë fitore korçarët u ngjitën përkohësisht në krye të renditjes në kuotën e 17 pikëve.
Përfundoi në barazim 2-2 sfida tjetër mes Kamzës dhe Flamurtarit e cila filloi me 15 minuta vonesë për shkak të mungesës në stadium të titullarëve të forcave të rendit. Golit të shpejtë të Sebino Plakut për vendasit iu përgjigj Busic në minutën e 23-të. Në fillimin e pjesës së dytë Musta i dha epërsinë Flamurtarit por atëherë kur dukej se vlonjatët po shkonin drejt fitores, mendoi malazezi Rolovic për t’i dhënë pak oksigjen Klodian Duros në stol. I asistuar nga Zisi, Rolovic realizoi golin e barazimit në minutën 87-të duke i evituar humbjen e 4-t rresht Kamzës që me pikën e marrë u ngjit në kuotën e 7 të tillave duke iu larguar dy vendeve të fundit, ndërkohë që Flamurtari i Dajës numëron 11 pikë.
