Partizani dhe Kukësi janë mbretërit e merkatos së dimrit, pasi kanë bërë lëvizje të studiuara dhe shumë të bujshme. Diçka që në të shkuarën e kishte ekskluzivitet Skënderbeu. Kampionët, të cilët janë në pritje të vendimit përfundimtar nga gjykata e Lozanës, kanë ndryshuar strategji në merkato, si në verë ashtu edhe në këtë periudhë riparimesh.
Ekipi korçar përbëhet nga të rinj premtues, ndërkohë që pjesa më eksperte e skuadrës është në prapavijë, me kapitenin Marko Radas për të vijuar me Kristi Vangjelin dhe Fidan Alitin, duke shtuar mesfushorët Gjergji Muzaka dhe Bruno Dita. Gjatë ditëve të fundit, te korçarët ka patur të tjera lëvizje në dalje, ku Demte, Guedje dhe Guindo kanë mbyllur aventurën me bardhekuqtë, ndërkohë që janë afruar të rinj premtues dhe me potencial. Në letër skuadra nuk ndryshon shumë, pasi nga formacioni titullar e vetmja mungesë është ajo e Demtes, që mund të zëvendësohet me Taipin, ashtu siç u pa në pjesën e dytë të sfidës ndaj Partizanit.
Ndërkohë, afrimet e tjera shtojnë alternativat dhe për më tepër vendosin në garë lojtarët e formacionit për të dhënë më të mirën. Këto lëvizje, por dhe buxheti i skuadrës, konfirmojnë që ky Skënderbe nuk është më ai i viteve të shkuara dhe klasifikimi tregon realitetin. Kampionët janë aty ku e meritojnë, pasi nuk kanë më atë skuadrën e frikshme, ndërkohë që drejtuesit po largojnë presionin e trofeve nga skuadra për të nisur një cikël të ri.
